Regles, des Pinceaux, & des Inſtrumens de Muſique.
L’Europe eſt ainſi nommée à cauſe de la fille d’Agenor Roy des Phœniciens, qui fut enleuée par Iupiter & menée en l’Iſle de Crete, & eſt icy dépeinte veſtuë en Reine, & de pluſieurs differentes couleurs, pour monſtrer par là, comme le remarque Lib. 2 Strabon, que cette partie du Monde eſt grandement riche, & que les beautez en ſont diuerſes.
La Couronne qu’elle porte fait voir que l’Europe a toûjours eu le principal aduantage ſur les autres parties de l’Vniuers, dont elle a triomphé comme Reine.
On la peint aſſiſe entre deux Cornes d’Abondance, pleines de toutes ſortes de fruicts : pource, qu’au rapport du meſme Strabon dans l’endroit que ie viens de citer, il n’eſt point de climat dans le Monde qui ſoit plus fecond & plus fertile que celuy-cy.
On luy fait tenir vn Temple de la main droite, pour ſignifier que dans ſon eſtenduë eſt cultiuée la vraye & parfaite Religion.
Le Sceptre qu’elle porte eſt le Symbole de ſa puiſſance, à cauſe qu’en ſon enclos tiennent leur Court les plus grands Princes du Monde, & particulierement le Souuerain Pontife Romain, l’authorité duquel s’eſtend generalement par tous les lieux où l’on fait profeſſion de la Foy Chreſtienne, qui par la grace de Dieu eſt aujourd’huy paruenuë juſqu’au nouueau Monde.
Par le Cheual & les Armes qui ſe voyent à l’entour d’elle, il eſt denoté qu’elle a touſiours emporté le prix en matiere des plus nobles connoiſſances, & des exercices de guerre, comme par les Liures & autres choſes ſemblables on peut iuger de l’excellence des Eſprits tant Grecs que Latins, qu’elle a produits en toutes ſortes de diſciplines.
L’Ameriqve.
Ette Femme qui a le teint oliuaſtre, le viſage
effroyable à voir, & vn voile de pluſieurs couleurs
qui luy couure le corps à demy, repreſente
l’Amerique. Outre qu’vne eſcharpe de plumes
tres-agreables, artiſtement jointes enſemble, la fait particu-
