Elle eſt repreſentée par vne Moriſque, pour eſtre ſouſmiſe au Midy, & meſme à la Zone Torride. D’où vient que ſes peuples ont naturellement le teint brun, ou meſme noir tout à fait.
On la peint nuë, d’autant que ce Pays-là n’a pas de grandes richeſſes, & qu’en diuers endroits il eſt infertile.
Ce qu’on luy donne pour coiffure la teſte d’vn Elephant, eſt tiré d’vne ancienne Medaille de l’Empereur Adrian ; car en effet c’eſt ce Pays-là qui produit le plus d’Elephans, dont les Africains ſe ſeruent ordinairement à la guerre. Ce qui n’eſtonna pas ſeulement autrefois les Romains leurs ennemis, mais qui leur donna meſme de la terreur, comme il eſt remarqué dans l’Hiſtoire.
On la peint auec des cheueux noirs & creſpus, pource que les Mores les ont tels ordinairement ; outre qu’on leur donne pour ornement le coral, d’autant que leurs femmes ont accouſtumé de s’en parer.
Le Lyon, le Scorpion, & les Serpens ſont icy adjouſtez auecque raiſon, pource que l’Afrique abonde en ſemblables animaux, qui ſont extremément venimeux.
Quant à la Corne d’Abondance pleine d’eſpics, elle demonſtre qu’autant que l’Afrique eſt ſterile en autres choſes, autant eſt-elle fertile en grains, comme le declare ce vers d’Horace.
Et tous les grains qui viennent de Lybie.
L’Europe.
Ette partie du Monde qui excelle par deſſus toutes
les autres, nous eſt figurée par vne Dame royallement
veſtuë d’vne robbe de pluſieurs couleurs.
Elle porte ſur la teſte vne riche Couronne, & ſe
voit aſſiſe au milieu de deux Cornes d’Abondance, dont l’vne
eſt pleine de toutes ſortes de fruicts, & l’autre eſtalle particulierement
des raiſins en abondane. Outre ces choſes, elle
tient de la main droite la figure d’vn beau Temple, & de la
gauche vn Sceptre. Vn Cheual eſt remarquable auprés d’elle,
auec quantité de Trophées, & d’Armes de toutes ſortes. A
quoy ſont joints encore à coſté, des Diadémes, des Couronnes,
des Mytres, des Liures, des Globes, des Compas, des
