Vigilance. CLXXI.
L ſeroit ſuperflu de deſcrire & d’expliquer icy cette
figure, puis que i’ay fait l’vne & l’autre en la cent
cinquante & ſixieſme, qui a pour rire le mot de
Soing, où ie renuoye le Lecteur pour s’en eſclaircir.
D’ailleurs, il n’y a celuy qui ne ſçache bien, Que la Lampe, le
Liure & la Gruë, ſont les vrays ſymboles de la Vigilance. Et
d’autant qu’il y en a de pluſieurs ſortes, il faut remarquer qu’on
en fait auſſi diuers tableaux ; Et que celle qui a pour but principal,
ou d’attaquer, ou de ſe deffendre, eſt repreſentée auec
vn Serpent en la main droite, & en la gauche vne Fléche, pour
monſtrer par là, Qu’on s’employe en vain à faire reüſſir vne
affaire, quelque ſoing qu’on y apporte, ſi la Prudence n’eſt
jointe à l’execution.
Virginité. CLXXII.
A figure eſt celle d’vne belle fille, veſtuë de blanc,
couronnée d’vne Guirlande, & qui d’vne façon
agreable s’eſtraint le milieu du corps d’vne Ceinture
de laine blanche.
L’Eſmeraude, ſelon Pierius, eſt vn ſymbole de Virginité. Auſſi fut-elle conſacrée, non pas à Venus la laſciue, mais à la celeſte, que les Anciens croyoient eſtre Deeſſe de l’Amour pure.
Quant à la Ceinture que nous donnons, elle luy conuient fort bien, puis qu’il eſt vray qu’anciennement les ieunes filles en auoient vne, qu’il n’eſtoit permis à perſonne qu’à leur mary de leur oſter la nuict de leurs nopces, comme le remarquent Feſt. Pompée, & le Poëte Catulle dans l’Epithalame de Manlius & de Iulie, où il dit parlant à Iunon,
Celle de qui l’Amour eſt pure
Ne t’inuoque iamais en vain,
Lors que d’vne tremblante main
On luy veut oſter la ceinture.