pour monſtrer par là les grandes difficultez qui ſe preſentent de toutes parts à ceux qui veulent viure vertueuſement. Les Poëtes feignent à ce propos, qu’Hercule encore ieune s’eſtant trouué dans vn lieu deſert où il y auoit deux chemins, l’vn ſemé de Roſes, & l’autre d’Eſpines, fut long-temps à deliberer à par ſoy, touchant celuy qu’il deuoit prendre, & choiſit enfin le dernier, quelque eſpineux qu’il fuſt, iugeant bien par là que c’eſtoit celuy de la Vertu.
Le meſme Hercule eſt touſiours repreſenté pour vn parfait modelle des plus hautes qualitez des grands Heros, en la pluſpart des anciennes Medailles ; Comme en celle de l’Empereur Gordian, où il porte la peau d’vn Lyon en l’vn de ſes bras, & en l’autre vne Maſſuë ; En celle de Maximin, où il s’appuye ſur la teſte d’vne Biche, qui ſeruit autrefois à exercer ſa Vertu ; En celle de Geta, où il eſt peint hauſſant le bras pour aſſomer le Dragon qui gardoit les Pommes des Heſperides ; Et en celle de Trajan, où il tient vne Maſſuë de la main droite, & en la gauche vn Lyon & vn Sanglier qu’il mene en leſſe.
