Theorie. CLXI.
Lle eſt peinte en ieune Femme, qui regarde le
Ciel, & ſemble deſcendre d’vn degré ; ayant les
mains iointes, vne Robe bleuë, & ſur la teſte vn
Compas ouuert, dont les deux pointes ſont tournées
en haut.
La Theorie, qui eſt vn mot Grec, ſignifie quelque deduction que ce ſoit de l’humaine Raiſon, fondée ſur le ſujet des choſes ſelon leurs ordres, & ſur la connoiſſance des principes, qui toutefois ne dependent pas du ſens, mais bien de l’entendement : Car ceux qui dependent du ſens font la Practique : Or eſt-il que cette derniere eſt oppoſée à la Theorie à l’eſgard des principes, qui ont tous pour but l’Art d’operer comme il faut, c’eſt à dire auecque mesure & iuſteſſe, ainſi que le teſmoigne Ariſtote au commencement de ſa Metaphyſique. La Theorie eſt donc vne connoiſſance & vne deduction des principes, qui dependent immediatement & mediatement de l’intellect ; Et peut-on bien dire, Que par la connoiſſance qu’elle inſpire de l’ordre des cauſes, elle ne donne pas moins de viuacité, que de ſuffiſance à diſcerner & reſoudre les choſes propoſées.
Sa Robe bleuë monſtre, Que comme par la lumiere cette couleur celeſte met des limites à noſtre veuë ; Ainſi par le moyen du raiſonnement, l’eſprit humain n’a point d’autre but que Dieu meſme, le ſiege duquel eſt au Ciel, lieu propre & proportionné à ſa Nature, qui comprend celle de toutes les choſes creées.
Son Viſage eſleué, ſignifie, Que tels que ſont nos yeux, à comparaiſon du Soleil et de la lumiere, tel eſt auſſi noſtre entendement à l’eſgard des choſes celeſtes. Or comme il y a quelque reſſemblance de l’œil auecque le Ciel, en ce que ſon Globe est enuironné de ſept pellicules, qui repreſentent les ſept Globes des Planettes, & qu’au milieu il y en a vn dur & petit, qui par diuerſes reflexions emprunte ſa clarté des ſept autres Cercles ; Ainſi pouuons-nous bien dire, Qu’en l’entendement il y a quelque repreſentation de Dieu & de la Diuinité, &
