Quant au Flambeau qu’il tient en la main, ſa lumiere eſt vn ſymbole de la gloire des Iuſtes, & de l’eſclat de leur nom, qui durera ſans fin, & en ce monde & en l’autre : Ce que perſonne ne peut mettre en doute, puis qu’il eſt dit dans les ſainctes 5. Math. 15. Lettres, Que les Iuſtes luiront comme le Soleil dans le Royaume de leur Pere.
Temperance. CLIX.
Lle eſt figurée par vne Femme modeſte, qui de
la main droite tient vne Bride, & de la gauche
vn Temps d’Horloge, auec vn Elephant à ſon
coſté.
On la dépeint auec vne Bride en vne main, & vn Temps en l’autre, pour monſtrer, Que le propre de la Temperance eſt de moderer les paſſions deſreglées : par où ce me ſemble eſt encore ſignifiée la meſure du mouuement & du repos ; Car cette vertu apporte à tous les deux la moderation requiſe, hors de laquelle les choſes qui vont dans l’excez deſtruiſent entierement le ſujet où elles s’attachent, comme par leur débordement les grandes riuieres rauagent tout ce qu’elles rencontrent.
Lib. 2. Pour le regard de l’Elephant, il eſt, ſelon Pierius, celuy de tous les animaux qui s’accomode le mieux à la Temperance ; Car depuis qu’on l’a vne fois accouſtumé à vn ordinaire reglé, il s’y tient touſiours. A quoy ſert de preuue cét exemple de Plutarque, Qui dit qu’en Syrie vn des valets d’vn grand Seigneur ayant eu ordre exprés de ſon Maiſtre de donner à chaque iour vne certaine meſure de grain à vn Elephant, ne luy en bailla que la moitié durant quelque temps ; Mais qu’en fin, comme il luy voulut donner vne fois la meſure toute entiere, l’Elephant la ſepara en deux auecque ſa trompe, & n’en mangea qu’vne ſeulement en la preſence de son Maiſtre, qui par ce moyen reconnut la fourberie de ſon valet, & n’en fut pas moins eſtonné que de la Temperance de cét ingenieux animal.
