eſt vn, ou s’il n’en eſt point ; c’eſt à quoy ie me trouuerois bien empeſché, s’il s’en falloit rapport aux reſueries des Anciens, qui ont eſté ſi fols que d’y aſſujetir Iupiter meſme. Mais ſans m’arreſter à ces fables, qui ſont chreſtiennement refutées par les ſaincts Peres, il me ſuffit de remarquer en general, Que le vulgaire nomme Deſtin l’euenement des choſes qui ſont contre l’intention de l’agent : Ce qui me ſemble aſſez bien exprimé par cette penſée d’vn Autheur Grec, qui dit, Qu’vn miſerable ayant pris vne corde pour s’aller pendre, la ietta bien viſte, comme il eut trouué fortuitement vn grand threſor en la foſſe qu’il auoit faite pour y eſtre enſeuely ; Mais qu’vn peu apres, celuy qui auoit caché cét or ne l’y trouuant plus, s’abandonna laſchement au deſeſpoir, & ſe pendit de la meſme corde que l’autre y auoit laiſſée.
Splendevr de nom. CLVIII.
Et Homme de bonne mine, de belle taille, & d’vn
aage viril, ſemble animer les grands courages à
faire des actions qui éclattent, & qui les mettent
dans vne haute reputation. Il eſt veſtu d’vne Robe
tiſſuë d’or & de pourpre, & couronné d’vne Guirlande d’Hyacintes
rouges. Auecque cela il porte au col vne chaine d’or,
& s’appuye de la main droite ſur vne Maſſuë, tenant de la gauche
vne Torche allumée.
On le peint agreable, & bien proportionné de ſes membres, pource qu’au dire de Platon, La beauté du corps eſt vne marque d’vne ame vertueuſe ; Et ſelon Ariſtote, Vn indice vray-ſemblable que l’interieur ne dément point l’exterieur.
Son aage viril ſignifie, Que n’ayant ny l’humeur éuentée des ieunes gens, ny la foibleſſe des Vieillards, il eſt en eſtat d’executer les hautes entrepriſes, où par vne grandeur de courage il ſe void porté, pour s’acquerir de la gloire.
Il eſt veſtu de drap d’or, à cauſe que ce metal eſt le plus noble de tous, & reſplendiſſant de ſa nature. Voila pourquoy les anciens Empereurs en auoient des robes tiſſuës, quand ils vouloient paroiſtre dans les ſolemnitez publiques. Teſmoin le vieil Tarquin, cinquieſme Roy des Romains, qui en porta vne,
