voiloit mettre en ſeureté dans la maiſon. De ces Anneaux, dont il s’en void pluſieurs encore aiourd’huy, il eſt fait vne expreſſe mention dans les remarques de Lipſe ſur les Annales Lib. 2 de Tacite : Et l’on s’en ſeruoit pareillement à cacheter des lettres, comme nous faiſons d’ordinaire. A quoy ſe rapport ce que l’on dit du grand Alexandre, à qui quelque Gentil-homme ayant vn iour preſenté vne lettre de la part de ſa mere, dans laquelle Antipater eſtoit mal traitté, il voulut qu’Epheſtion ſon fauory en ſçeuſt le contenu. Mais il ne l’eut pas pluſtoſt leuë, qu’ayant tiré de ſon doigt la bague qui luy ſeruoit de cachet, il la luy mit à la bouche, pour le faire ſouuenir de garder le Silence. Suet. in Aug. c. 5 L’Empereur Auguste prit à cét effet pour ſa deuiſe la figure d’vn Sphinx, qui ſelon Pierius eſt le Ieroglyphe du Secret, comme l’Image d’Harpocrates l’eſtoit jadis du Silence.
Elle a pour meſme fin vne Grenoüille à ſes pieds, non pas de celles qui eſtourdiſſent le monde au Printemps par le grand bruit qu’elles font ; mais bien de ces autres dont parle Pline, qui ſont muettes, & qui s’engendrent en diuerſes contrées de la terre. Elles ſe voyent ſur tout en Macedoine, en Affrique, dans les deſerts de Syreine, en Theſſalie, au Lac de Siſendre, & particulierement en l’Iſle Seriphe, qui eſt en la mer Egée ; Ce qui a donné lieu à ce Prouerbe, Rana Siriapha, qui ſe dit proprement de ceux qui ſont d’vne humeur taciturne ; Tellement que c’eſt fort à propos que la Grenoüille eſt icy miſe pour le ſymbole du Silence, & pareillement dans les deuiſes Heroïques de Paradin. Car il remarque fort iudicieuſement, Qu’elle eſtoit grauée dans le cachet de Mœcenas, que l’Empereur Auguſte aima grandement, pour auoir eſprouué ſouuent ſa merueilleuſe conſtance à ne publier iamais ce qu’il fallait taire touchant les affaires de ſon Eſtat.
Sevreté. CLIII.
A peinture que nous en faiſons icy eſt copiée ſur vne
ancienne Medaille de Macrin, où elle eſt repreſentée
par vne Femme, qui de la main droite s’appuye ſur vne Picque,
& de la gauche ſur vne Colomne.
L’on appelle Seureté vne force d’eſprit ineſbranlable dans les affaires du monde ; ou ſi vous voulez, vne ferme confiance
