Iob. c. 28 adjouſter, Que dans la ſaincte Eſcriture meſme il eſt aſſez ſouuent parlé du Coq, par qui ſont entendus les Predicateurs, & les Docteurs, qui chantent & publient dans les Eglises la Sapience Diuine.
La Colombe qui ſe void peinte ſur ſon Eſcu, eſt le Sainct Iob. c. 38 Eſprit, qui comme dit Iob, nous apprend la Sapience : Or par cét Eſcu de forme ronde, s’entend l’Vniuers, où ceux qui ſont eſleuez aux dignitez les plus hautes doiuent s’eſtudier à vne ſage conduite. A quoy les inuitent particulierement ces Sap. c. 6 belles paroles de l’Eſcriture, S’il est vray que vous aimiez vos Thrônes & vos Sceptres, ô Roys des Peuples, aimez la Sapience, afin que vous regniez à iamais, &c. Le Saint Eſprit eſt donc mis icy fort à propos dans vne figure ronde, d’autant que par luy la Sapience Diuine gouuerne l’Vniuers, & qu’il inſpire vne vraye lumiere, & de ſalutaires inſtructions à ceux qui en ont la conduite.
Le Liure fermé où pendent des Sceaux, ſignifie, Que les iugemens de la Sapience Diuine ſont cachez aux hommes ; Et qu’à cauſe qu’elle eſt enueloppée de pluſieurs nuages, l’acquiſition en eſt extremement difficile. Voila pourquoy le plus ſage de tous les hommes la compare à vn threſor qu’on a caché dans la terre. Or ce qu’elle eſt ainſi ſcellée, n’eſt pas afin que les hommes en ſoient priuez, mais pour les induire à ſe l’acquerir par leur induſtrie, ſans que toutesfois ils en deuiennent ny plus altiers, ny plus amoureux d’eux meſmes. D’ailleurs l’obſcurité de la parole diuine ſe peut dire vtile, en ce qu’elle fait eſclatter dauantage la Verité, meſme parmy les broüillards, tandis que les vns & les autres l’expliquent diuersement, comme le remarquent particulierement le grand In Ezech. S. Gregoire, & S. Auguſtin.
L’Agneau Paſchal eſt mis à fort bon droit ſur le Liure, In Pſalm. 126. Cap. 5 pource que ſuiuant ces paroles de l’Apocalypse, Ce meſme Agneau qui a eſté immolé, eſt vn digne ſujet de Vertu, de Sapience, & de Diuinité. L’autre raiſon eſt à l’eſgard de la condition des creatures humaines, qui ne doient point eſtre ſuperbes ny malicieuſes, ſi elles aſpirent à la Sapience ; Car elle ne fait ſa demeure que dans les ames pures & nettes, ayant comme elle a pour ſolide fondement la crainte de Dieu ; Ce qui nous eſt declaré par l’exemple de l’Agneau, qui eſt le plus innocent & le plus craintif de tous les animaux de la terre.
