pluſtoſt que du veritable ; ſi ce n’eſt que l’on vueille dire, Que les pierreries dont on fait preſent aux Dames ne ſont que trop capables de les appaiſer, quelques faſchées qu’elles ſoient ; puiſque, comme dit Ouide, a. de Art. Amand.
Les dons peuuent fleſchir & les Dieux & les hommes.
Auſſi par la Coupe que tient cette Fille, eſt demonſtré le merueilleux pouuoir qu’ils ont ſur vne Dame, quelque ſeuere qu’elle ſoit. Car ſi elle eſt genereuſe iuſques au point de les refuſer, du moins en ſçaura-t’elle du gré : Comme au contraire, ſi elle eſt d’humeur à les receuoir, ſes intereſts propres l’obligeront à faire la paix auec ſon Amant.
Quant aux deux Amours qu’elle tient par la main, cela ſignifie, Que les Amitiez ſe renforcent apres la Reconciliation, In Amph. Car alors, comme dit Plaute, & les Amants, & les Amis font à l’enuy à qui ſe careſſera dauantage. Ce qui ſembleroit peu croyable, ſi l’experience ne l’aſſeuroit, outre les exemples que les Anciens nous en donnent, & particulierement Elian, parlant de Pauſanias & du Poëte Agaton.
Religion. CXLIII.
Lle eſt figurée par vne Femme voilée, qui a du Feu
en la main gauche, en la droite vn Liure & vne
Croix, & à ſon coſté vn Elephant.
21. part. q. 71, art. quæſt. 24, art. 2 La Religion, ſelon ſainct Thomas, eſt vne Vertu morale, par laquelle l’homme reuere & honore Dieu interieurement auecque l’ame, & exterieurement auecque le corps. Comme les hommes, dit Ariſtote, y ſont portez naturellement ; Auſſi eſt-ce par elle plus que par la raiſon meſme qu’il differe des beſtes, qui en ſont deſpourueuës.
Elle a le viſage voilé, pource qu’il eſt veritable qu’elle a touſiours eſté ſecrette, & s’eſt conſeruée dans les ceremonies & les figures, comme ſous des voiles deliez.
La Croix eſt la victorieuſe Banniere de la vraye Religion, que les Chreſtiens ont accouſtumé d’auoir en grande veneration, comme reconnoiſſant que par elle ils ont eſté racheptez.
Le Liure qu’elle porte eſt celuy des ſainctes Eſcritures, par qui elle s’eſtablit dans les ames ; Et le Feu eſt vn ſymbole de la deuotion qu’elle y allume.
