Que ſous le Ioug des Loix il rangeroit les hommes.
Car on peut dire veritablement, Que les ſujets ſont ſous le joug de leur Prince. Que ſi les Rebelles taſchent de le ſecoüer, c’eſt leur humeur altiere & ingrate qui les y pouſſe, & qui les porte au mépris des Loix, ſans faire eſtat de l’obeïſſance qu’ils ſont obligez de rendre à leurs Souuerains. C’eſt donc à bon droit, Que pour faire voir icy l’inſolence de la Rebellion, nous luy mettons vn Ioug ſous les pieds, qu’elle foule par vn mépris manifeſte.
Reconciliation d’amovr. CXLII.
A voicy repreſentée ſous la figure d’vne ieune
Fille, qui porte à ſon col vn beau Saphir, en ſa
main droite vne Coupe, tandis que de la gauche
elle tient deux petits Amours.
L’on appelle Reconciliation vne Amour renouuellée ; ce qui aduient quand on ſe remet bien auec la perſonne aimée : Car tout le monde ſçait qu’vn excez d’Amour engendre ſouuent les ſoupçons & les injures ; A quoy le deſdain, le mépris, & le courroux ſuccedent pour l’ordinaire : Le Poëte Horace a fort bien dit à ce propos, Sat. 3. lib. 2
Qu’en tous les maux qu’Amour a ſemez, ſur la terre,
La guerre ſuit la paix, & la paix ſuit la guerre.
Toutes ces picoteries ſont les creatures d’vne paſſion trop forte : Car plus vn Amant a d’Amour, & plus il s’offence de la moindre choſe ; s’imaginant touſiours que le ſujet aimé ne reſpond pas à ſon affection, & qu’il fait tort à ſes merites. Cependant cét ombrage qu’il ſe donne le porte au deſdain pour quelque temps ; Mais apres auoir bien faſché la choſe aimée il s’en repent à la fin, il ne peut plus tenir ſa colere, il s’accuſe ſoy-meſme, & deſire paſſionnément de faire ſa paix ; Ce qui s’appelle Reconciliation d’Amour,
Entre les vrays Amants l’Amour ſe renouuelle
Par leur propre querelle.
Le Saphir de couleur celeſte eſt vn symbole de cette Reconciliation, pource que ſelon Dioſcoride, il a cette vertu ſecrette de remettre en bonne intelligence ceux qui le portent, & qui ſont mal enſemble : Mais cela tient du ridicule, à mon aduis,
