eſtre fort moderez en leurs propres actions, & ſe tenir dans vne grande iuſteſſe, puis qu’ils ſont eſclairez de beaucoup d’yeux, & que la malice des hommes va ſi auant, qu’ils s’eſtudient à faire paſſer pour vices iuſques aux vertus les plus hautes, qui ne peuuent que difficilement eſchapper à leur cenſure.
Prevoyance. CXXXV.
Ette Femme à deux teſtes, qui porte vn Compas
en vne main, & en l’autre l’oyſeau qu’on appelle Eſmerillon,
eſt le vray ſymbole de la Preuoyance.
Ses deux teſtes nous apprennent, Que la connoiſſance du paſſé ſert grandement à preuoir l’aduenir. Auſſi n’y a-t’il celuy qui ne ſçache, Que l’experience fait les hommes prudens, & par conſequent capables à peu prés d’aller au deuant des malheurs qui les menacent ; Car preuoir & preuenir vn mal, ſont des effets conuenables à la Prudence. C’eſt à raiſon de cela qu’on eſtime vtile à la vie humaine la connoiſſance de pluſieurs hiſtoires, & des ſuccez les plus memorables aduenus de long-temps ; pource qu’elle produit en nous cette force de Prudence, qui eſt requiſe pour iuger des choſes à venir ; A quoy nous ne pourrions pretendre autrement, à moins que d’eſtre deceus & blaſmez d’vne curioſité ridicule.
Le Compas ouuert monſtre, Que pour preuoir les Euenemens, il faut ſçauoir meſurer les qualitez, & l’ordre des temps auec vn eſprit iudicieux, & vn ſolide raiſonnement.
Prix. CXXXVI.
A figure eſt celle d’vn homme veſtu de blanc, &
dont la Ceinture eſt de fin or ; Ayant de plus, vne
Palme en la main droite, auec vn rameau de Cheſne,
& en la gauche vne Couronne & des Guirlandes.
Le Prix, ou la recompenſe a deux parties principales, à ſçauoir l’Honneur, & l’Vtilité, qui ſont icy diuerſement denotées, l’vne par le Cheſne, & l’autre par la Palme.
Quant au veſtement blanc, & à la Ceinture d’or, cela demonſtre la Verité, quand elle eſt ſuiuie d’vne eminente Vertu :
