doigts qu’il auoit trempez dans le ſang de la victime : Par où, comme diſent les Theologiens, nous ſommes aduiſez d’eſtre obeïſſans, & d’executer de point en point, tout ce qui appartient au ſacré culte de Dieu.
Œvvre manifeste. CX.
Est vne Femme qui a les deux mains ouuertes,
auec vn œil au milieu tant de l’vne que de l’autre.
Cette Figure de l’inuention des Anciens, eſt aſſez claire d’elle-meſme. Par les mains s’entendent les œuures, dont elle ſont les principaux inſtrumens, comme par l’œil eſt demonſtré leur qualité : car il faut qu’elle ſoit claire, & non pas ſemblable à la lanterne, qui luit pour les autres, ſans s’eſclairer elle-meſme : en cela contraire à l’œil, qui s’embellit par ſa propre lumiere : ce qui nous declare, qu’il ne faut point mettre la main à l’œuure par vne eſpece de vaine gloire, ny pour vne fin mecanique, mais pour ſe faire du bien à ſoy, & à ſon prochain.
Œvvre parfaite. CXI.
Lle eſt aſſez remarquable par la peinture de cette
Femme, qui tient vn Miroir de la main droite, &
de la gauche vne Eſquierre, & vn Compas.
Le Miroir eſt tel que noſtre entendement, où nous faiſons naiſtre des idées de pluſieurs choſes que nous ne voyons point ; aidez en cecy de la diſpoſition naturelle, bien que toutesfois elles puiſſent eſtre miſes en œuure, par le moyen de l’Art, & des inſtrumens qu’on y employe.
Mais pour bien executer ce qu’on a deſſeigné, il faut ſçauoir premierement, quelles qualitez y ſont neceſſaires ; à quoy le Compas & l’Eſquiere ſeruent de beaucoup : car il faut que nous adjuſtions nos forces à la deſpenſe requiſe, & la choſe imaginée à la réelle : Que ſi l’on fait autrement, apres s’eſtre beaucoup donné de peine, l’on treuue à la fin, qu’on ne peut acheuer ce qu’inutilement on a commencé.
Que ſi au lieu d’vne œuure acheuée quelqu’vn en veut repre-
