plein de vin, qui eſt à ſes pieds, & par vne Lyre auec ſon archet.
La Cigale, qui eſt ſur le Ciſtre, ſignifie la Muſique, pour vne choſe extraordinaire aduenuë à vn certain Eunomius : car comme il joüoit vn iour de cét inſtruement en vn deffi d’Ariſtoxene & de luy, l’vne des cordes s’eſtant rompuë, vne Cigale vola deſſus fortuitement, & ſupplea par ſon chant au manquement de la corde ; ſi bien qu’Eunomius demeura victorieux. De ſorte que pour memoire d’vn euenement ſi remarquable, les Grecs luy dreſſerent depuis vne ſtatuë auec vn Ciſtre à la main, où la Cigale eſtoit peinte.
Quant au Roſſignol, l’on ne peut douter qu’il ne ſoit vn vray ſymbole de la Muſique, pour les merueilleux effets de ſa voix, qui charme ceux qui l’eſcoutent, & qu’il hauſſe & baiſſe en toutes les façons imaginables, comme s’il ſçauoit parfaitement les regles de ce bel Art.
Et d’autant que la Muſique n’a eſté inuentée que pour combattre la Melancolie, elle ne peut auoir de meilleur ſecond que le vin qu’on luy met auprés : car ce luy eſt vne vertu ſpecifique de faire eſuanoüir les ennuys ; joint que s’il eſt bon & delicat, il fortifie la voix : A raiſon dequoy les Anciens ont eu raiſon de mettre Bacchus en la compagnie des Muſes.
Natvre. CV.
Lle ſe void icy repreſentée comme dans vne Medaille
de l’Empereur Adrian, à ſçauoir par la figure
d’vne Femme nuë, qui a du laict aux mammelles,
& vn Vautour à la main.
La Nature, ſelon Ariſtote, ne pouuant mieux eſtre definie, Qu’vn principe de mouuement & d’alteration en la choſe où elle ſe trouue, par qui s’engendre tout ce qui eſt corruptible ; Ce n’eſt pas ſans raiſon qu’elle eſt peinte en Femme nuë : car comme ce Principe ſe diuiſe en Actif & en Paſſif, dont l’vn eſt appellé Forme, & l’autre Matiere ; L’Actif ne peut mieux eſtre denoté que par les mammelles pleines de laict, parce que la Forme eſt ce qui entretient les choſes creées, tout ainſi que les tetins de la femme nourriſſent l’enfant ; ny le Paſſif auſſi mieux demonſtré que par le Vautour, oyſeau fort flouton ; eſtant
