Misericorde. CI.
Ovs la depeignons par vne Femme qui a le teint
extremement blanc, le nez vn peu aquilin, vne
Guirlande d’Oliuier à la teſte, le bras gauche ouuert,
vn rameau de Cedre en la main droite, & à
ſes pieds vne Corneille.
Lib. 2. cap. 24. La Miſericorde, qui felon ſainct Iean Damaſcene, eſt l’affection d’vn cœur remply de tendreſſe, & qui prend part à la miſere d’autruy, a le viſage tel que nous le venons de deſcrire, Phiſion. c. 6 pource que telle eſt auſſi, ſelon Ariſtote, la phyſionomie d’vne perſonne qui a de l’inclination à la pitié.
La Guirlande d’Oliuier qu’elle a ſur la teſte, eſt dans les ſaintes Lettres vn vray ſymbole de Miſericorde, comme le rameau de Cedre en eſt vn autre, ainſi que le remarque Pierius.
Elle ouure les bras, pource qu’à l’exemple de noſtre Seigneur Ieſus-Chriſt, ſource de cette vertu, elle eſt touſiours preſte à ſecourir les affligez, & à les embraſſer dans la plus forte violence de leurs miſeres.
Quand à la Corneille que l’on a miſe à ſes pieds, il ne faut que lire ce qu’en dit Orus Apollo, pour apprendre que les Egyptiens reueroient particulierement cét oyſeau, à cauſe qu’ils le connoiſſoient enclin à la compaſſion par deſſus tous les autres.
Modestie. CII.
Ette Vierge veſtuë de blanc, & coiffée d’vn ſimple
couure-chef, ſans auoir autre ornement qu’vne
ceinture d’or, tient la teſte baiſſée, & vn Sceptre
myſterieux à la main, auec vn œil au deſſus.
La Modeſtie, qui conſiſte principalement à fuir les extremitez, & à ſe tenir dans vn iuſte milieu, eſt ſimplement coiffée, & veſtuë d’vne robe blanche, pource qu’elle ſe contente de peu, & que fuyant tous excez, elle n’a rien de ſi cher, que de conſeruer dans vne vraye moderation la pureté de ſon ame.
