pliquer les inſtrumenſ de Geometrie, principalement le pied, dont il eſt dit dans Horace : Epiſt. 7. lib. 1
Qu’il eſt bon que chacun à ſon pied ſe meſure.
Et pareillement la Perche, qui ſeruant à meſurer nos terres, nos poſſeſſions, & nos meſtairies, qui nous fourniſſent dequoy viure ; nous apprend par Metaphore à meſurer noſtre bien par nos rentes, & a ſuiure cét aduis d’Horace, Horat. li. 2. Sat. 3
Selon ton reuenu modere ta deſpenſe.
Cela nous encore demonſtré par le Niueau, qui eſt vne figure myſtique de la Iuſtice & de l’égalité, qu’il faut que nous obſeruions icy bas. Et comme par le moyen du plomb, eſt priſe la dimenſion de la hauteur, nous deuons de meſme meſurer celle de nos penſées auecque prudence & iugement ; puiſque, comme dit Seneque, In Oedip.
L’ouurage que l’on fait ſans poids & ſans meſure
N’eſt pas choſe qui dure.
Et que l’experience nous monſtre, Martial.
Qu’il faut touſiours auoir pour les charges peſantes,
Des forces ſuffiſantes.
Metaphysique. C.
N la repreſente par vne Femme qui a les yeux bandez,
vne Couronne à la teſte, vn Sceptre en main,
& à ſes pieds vn Horloge & vn Globe.
Par le voile de ſes yeux il eſt ſignifié, Qu’elle les tient ſans ceſſe fermez à tous les objets qui attirent les creatures mortelles apres les vanitez de la terre :
Par ſa Couronne & ſon Sceptre, Qu’elle eſt Reyne de toutes les autres Sciences, qui s’acquierent par la lumiere naturelle ; Et par l’Horloge & le Globe, Que meſpriſant tout ce qui eſt ſujet aux revolutions du Temps, elle ne s’employe qu’à la contemplation des choſes celeſtes.
