Elle eſt icy peinte graue & modeſte, à cauſe que toutes ces qualitez conuiennent fort bien à la profeſſion qu’elle fait, de conſiderer la ſimple vertu des choſes, pour apprendre à diſcerner le vray d’auecque le faux.
Son action reſveuſe, eſt vne marque de la grauité de ſes penſées, qui n’ont pour but que les choſes profitables, que le ſage ſe doit touſiours propoſer, pour agir parfaitement, & non pas à la volée.
Les Liures ſur qui elle s’appuye, ſont les marques de ſa propre operation, fondée ſur les eſcrits des bons Autheurs, qui contiennent les principes naturels, par qui l’on procede à la recherche de la Verité.
Pour ce qui regarde l’autre Liure qu’elle tient fermé, cela veut dire, Qu’elle fait diuerſes reflexions ſur la connoiſſance des choſes, pour en former de bons ſentimens, qui ne ſont pas moins glorieux que profitables à l’homme.
Medecine. XCV.
N la repreſente par vne Femme aagée, qui a ſur la
teſte vne Guirlande de Laurier, en la main droite
vn Coq, & en la gauche vn Baſton noüeux, enuironné
d’un Serpent.
La Medecine, qui par les cauſes des maladies iuge des moyens de les guerir, eſt depeinte aagée, poſſible pour s’accomoder à l’opinion des Anciens, qui ont creu, Que depuis qu’vn homme auoit paſſé quarante ans, ce luy eſtoit vne honte d’appeller le Medecin. Par où ils preſuppoſoient, qu’ayant connoiſſance de ſa propre complexion, il ſe pouuoit guerir luy-meſme, en s’abſtenant de ce qu’il connoiſſoit luy eſtre nuiſible. De là vient auſſi que par le moyen de l’Art & de l’Experience, vn vieil Medecin maintient en eſtat la ſanté preſente, & recouure celle qu’on a perduë.
Elle eſt couronnée de Laurier, d’autant que cét Arbre ſert à pluſieurs maladies. C’eſt pourquoy le premier iour de Ianuier, les Romains ſouloient donner de ſes fueilles aux nouueaux Magiſtrats, pour les aduertir de conſeruer leur ſanté toute l’année.
On luy fait porter vn Coq, & vn Serpent, pource que ces
