dans Athenes à ceux qui eſtoient nouuellement mariez. Auſſi eſt-il, ſelon Pierius, vn ſymbole de fecondité & d’amour reciproque, comme il ſe remarque en pluſieurs Medailles, où l’on le fait porter au ieune Hymenée.
Quant à la Vipere, qui eſt ſous les pieds de cette Eſpouſe, cela monſtre, Qu’il faut qu’vne femme d’honneur foule aux pieds toute ſorte de penſées indignes d’elle, & qui choquent tant ſoit peu la foy promiſe à ſon mary, ne faiſant pas comme la Vipere, qui par vn excez de volupté brutale tuë le Serpent, dans les embraſſements duquel elle eſt enlacée.
Mathematique. XCIII.
Est vne Femme d’aage mediocre, couuerte d’vn
voile blanc & tranſparant, auecque des aiſles à ſa
teſte, vn Globe celeſte en la main gauche, & en la
droite vn Compas, dont elle trace pluſieurs figures.
Par ſon aage vn peu auancé, nous ſommes aduertis, Que cette Science eſtant des plus belles & des plus certaines, pource qu’elle n’agit que par demonſtrations, l’on ne doit pas s’eſtonner s’il faut du temps & de l’aſſiduité pour l’acquerir. Par ſon habit tranſparant, Que les preuuves qu’elle donne ſont ſi claires & ſi euidentes, qu’à moins que d’eſtre deſpourueu de ſens commun, il eſt impoſſible de les mettre en doute ; Et par les aiſles de ſa teſte, Qu’auec la force de ſon eſprit, elle s’eſleue à la contemplation des matieres les plus hautes, & les plus ſpeculatiues. Ce qui eſt encore declaré par le Globe celeſte qu’elle tient en vne main ; & pareillement par le Compas, inſtrument propre à cette profeſſion, qui s’eſtudie à connoiſtre les proportions, & les meſures de toutes choſes.
Meditation. XCIV.
Est vne Femme d’vn aage meur, & d’vn viſage
graue & modeſte. De la maniere qu’elle eſt aſſiſe, elle
paroiſt toute penſiue, ayant la main gauche appuyée
ſur ſa joüe, & en la droite vn Liure fermé, ſans y
comprendre les autres qu’elle a ſous les pieds.
