La Laſſitude dont nous parlons, qui n’eſt point cauſée de maladie ; mais d’vn trop violent exercice, ou d’vne raiſon trop chaude, eſt dépeinte maigre, pource que la ſanté du corps venant à l’exhaler par le moyen de la chaleur, il faut neceſſairement qu’elle ſe deſſeiche.
Son habillement, & ſon ſein deſcouuert, ſont des marques des trop violentes ardeurs de l’Eſté ; Car en ce temps-là l’on a de couſtume de s’habiller à la legere, afin de ſe raffraiſchir, & de n’eſtre ſi toſt laſſé.
Elle s’appuye, pource qu’elle a beſoin de ſouſtien, à cauſe qu’elle manque de forces : ce qui s’accomode fort bien à la langueur que nous deſcriuons, qui ne procede que de foibleſſe.
C’eſt auec raiſon encore, qu’elle vſe de l’Euentail, qui par l’agitation qu’il fait de l’air eſchauffe, en ſemble produire vn autre plus commode, & plus propre à rafraiſchir le corps humain.
Liberté. LXXXVI.
A figure eſt celle d’vne Femme veſtuë de blanc,
ayant vn Sceptre en la main droite, vn Bonnet en
la gauche, & vn Chat prés d’elle.
Le Sceptre ſignifie l’Empire de la Liberté, qui ne le tient que de ſoy-meſme, eſtant comme elle eſt, vne abſoluë poſſeſſion d’eſprit, de corps, & de commoditez temporelles, qui nous incitent au bien par diuers moyens ; à ſauoir l’eſprit, par vne grace particuliere de Dieu, le corps, par l’aide de la Vertu, & la richeſſe, par la direction de la Prudence.
Elle eſt peinte auec vn Bonnet en main, d’autant que par vne ancienne couſtume, les Romains le faiſoient porter à celuy de leurs Eſclaues qu’ils vouloient affranchir, & le remettre en liberté, apres luy auoir razé les cheueux ; Ceremonie qui ſe faiſoit d’ordinaire dans le Temple de la Deeſſe Feronia.
L’on met vn Chat à ſes pieds, pource qu’il n’y a point d’animal qui aime tant la liberté que celuy-là, qui ne peut ſouffrir en aucune ſorte d’eſtre enfermé : à cauſe dequoy quelques peuples, & particulierement les Bourguignons, le portoient anciennement pour deuiſe en leurs enſeignes de guerre.
