Intelligence. LXXXIII.
’Est vne Femme veſtuë de gaze d’or, & couronnée
d’vne Guirlande, tenant vne Sphere d’vne
main, & d’vn Serpent de l’autre.
L’Intelligence, qui peut eſtre definie, vne mutuelle vnion que fait noſtre eſprit auecque la choſe qu’il entend, eſt veſtuë de gaze d’or, pource qu’elle doit eſtre reſplendiſſante comme ce metal ; & non pas commune, mais precieuſe, & tout à fait eſloignée des notions baſſes & vulgaires.
Nous pouuons adjouſter à cecy la figure de cette haute Intelligence, qui ſelon les Philoſophes, fait mouuoir les Spheres celeſtes. Mais noſtre principal deſſein eſtant de traiter des choſes qui dépendent des connoiſſances humaines, nous ne parlerons que de celle-cy, qui par la Sphere & le Serpent qu’elle tient en main, nous apprend, Que pour bien entendre les hautes matieres, il faut premierement ramper comme le Serpent, & aller terre à terre dans les principes des choſes terreſtres, qui ſont incomparablement moins parfaites que les celeſtes, & plus conformes par conſequent à la portée de nos eſprits.
Invention. LXXXIV.
Ette Maiſtreſſe des Arts eſt icy veſtuë d’vne robe
blanche, où ces deux mots ſont eſcrits, Non alivnde.
Elle a ſur la teſte deux aiſlerons, en vne main l’image
de la Nature, & en l’autre, vn Rouleau, où il est
eſcrit, Ad operam.
On la repreſente ieune, d’autant qu’en ce premier aage, la chaleur du ſang fait que les eſprits s’eſleuent dans l’intellect, où par la force du Raiſonnement ſe forment les inuentions.
Elle eſt veſtuë de blanc, pource que l’Inuention doit eſtre pure, & ne ſe point ſeruir du trauail d’autruy, d’où vient qu’il eſt dit,
