Par la Cygongne, pource, dit Orus Apollo, qu’il n’y a point d’animal qui ſoit plus reconnoiſſant que celuy-cy, qui ſoulage continuellement la vieilleſſe de ceux qui l’ont mis au monde. Car en ce meſme lieu où il a eſté nourry, il leur fait vn nid des deſpoüilles de leurs plumes inutiles, & leur donne à manger, en attendant que les bonnes leur ſoient reuenuës, & que d’eux-meſmes ils puiſſent trouuer à viure ; A raiſon dequoy cét animal eſtoit en grande conſideration chez les Egyptiens, & ſeruoit de myſterieux ornement aux Sceptres des Rois.
Par le Rameau de fleurs de febues ; d’autant que les legumes Lib. 18. c. 14. de cette eſpece, comme le remarque Pline, engraiſſent le terroir où elles viennent, & nous enſeignent par conſequent, Que nous deuons touſiours contribuer par nos ſoins à la bonne fortune de ceux qui ſont cauſe de la noſtre.
Par l’Elephant, pource que cét animal n’oublie iamais le bien qu’il a receu. Teſmoin celuy dont parle Elian, qui voyant ſon Maiſtre mort par la violence de ſes ennemis, le print auecque ſa trompe, & le porta dans ſon eſtable, où il fut longtemps pres de luy ſans vouloir manger, auec de ſi grandes demonſtrations de dueil, que tous ceux qui le voyoient en eſtoient eſmeus à pitié.
Gravité. LXXIV.
Est vne Dame honorable, veſtuë de pourpre, &
qui porte au col en forme de joyau vne Lettre de
cachet. Son viſage ſe tourne du coſté d’vn Flambeau
allumé, qu’elle tient en ſa main gauche, &
de la droite elle empoigne la teſte d’vne petite Statuë, eſleuée
ſur vn pied-deſtal.
La robe de pourpre luy eſt conuenable, pour eſtre vne marque d’honneur, & de dignité, qui rend plus majeſtueuſe & plus graue la perſonne des grands Princes.
La Lettre ſcellée qu’elle porte penduë au col, eſt comme le Caractere de ſa Nobleſſe, qui la fait paroiſtre plus releuée ; Et le Flambeau qu’elle tient en eſt vn autre de ſon merite, qui ne s’accomodant qu’aux choſes graues & ſerieuſes, ſert de fanal à tout le peuple, & luy donne ſur luy le meſme auantage qu’a le Soleil deſſus les moindres lumieres.
