eux non ſeulement les creatures humaines, mais les inſenſibles meſme auoient leur Genie, comme il ſe void par diuerſes Medailles, qui luy attribuent la garde des threſors & des greniers.
Mais quant à cét autre Genie, qui ſe prend d’ordinaire pour l’inclination que nous auons à quelque choſe, & pour le plaiſir qui en reuient ; on luy peut donner des aiſles, pour vn ſymbole de la choſe qui nous plaiſt, & qui nous reuient touſiours en la fantaiſie. Par exemple, ſi quelqu’vn eſt porté aux Lettres, qu’on luy mette des Liures en main ; Si à la Muſique, des Luths, & autres tels inſtruments ; Si à la Guerre, des Armes, & ainſi du reſte. Par meſme moyen qu’on le couronne de fueilles de Plane, arbre Genial, & qui pour n’eſtre pas moins beau qu’il eſt commode, pour la grande ombre qu’il fait, fut l’vn des plus agreables ornemens de l’Academie d’Athenes.
En quelques Medailles, le Genie des Romains eſt couronné de laurier, pource que ce peuple ne ſe plaiſoit qu’à la guerre & aux triomphes. En d’autres on luy fait porter des Eſpics, des fleurs, & des branches d’Oliuier, comme en celles de Trajan, & de Marc-Aurelle Antonin. Mais la plus remarquable de toutes eſt celle de Neron, tenant de la main droite vne Couppe à ſacrifier deuant vn Autel, & de la gauche vne Corne d’abondance. Et il faut bien croire que par vn excez de flatterie l’on frappa cette Medaille en ſa faueur, puis qu’il est certain que le Genie de ce Prince, c’eſt à dire ſon humeur, ſe portoit au mal pluſtoſt qu’au bien ; à l’impieté, non pas à la Religion, & à la ruine des biens plus volontiers qu’à leur accroiſſement.
Gloire. LXIX.
Ette Image eſt tirée des anciennes Medailles, où
elle eſt peinte de meſme qu’icy. Car auec ce que le
haut de ſon corps eſt preſque tout nud, elle porte
vne Sphere où ſont les douze ſignes du Zodiaque,
& vne petite Figure qui tient vne Palme d’vne main, & de
l’autre vne Guirlande.
Sa nudité ſignifie, Qu’il n’y a iamais de fard dans les actions glorieuſes, pource qu’elles paroiſſent à deſcouuert en quelque temps que ce ſoit. La Sphere qu’elle porte, Que les conſiderations d’icy bas ne l’obligent pas tant à des exploits héroïques,
