ſpagne : mais, pour reuenir à mon diſcours, les
nopces (pour le faire court) du roy de Nauarre,
& de Marguerite ſœur du Roy, ſe celebrerent en
treſgrande pompe, le lundi dixhuictieme iour du
mois d’Aouſt dernier paſſé : les Princes, Comtes,
Barons, & autres ſeigneurs, & gentilshommes de
marque Huguenots, y aſsiſtoyent preſque tous,
dont aucuns y auoyent amené leurs femmes & enfans.
Et pouuoyent eſtre en tout, enuiron mille
gẽtils-hommes.
Le mardi, mecredi, & ieudi ſuyuans, furent
employez en toutes ſortes de ieux & paſſe temps à
rechange, eſquels l’Amiral ſouuent aſsiſtoit, ayãt
le bon viſage du Roy à l’accouſtumé.
Le mecredi, l’Amiral voulãt entretenir le Roy
de quelques affaires de grande importãce, le Roy
en riant, le pria de luy donner quatre iours pour
s’eſgayer & esbatre, promettãt à foy de Roy, qu’il
ne bougeroit de Paris, qu’il ne l’euſt rendu content,
& tous ceux qui auoyent affaire à luy.
Peu de iours auparauant, outre les auertiſſemens
ſuſdicts, l’Amiral auoit eſté aduerti de
certain homicide, fait par des Catholiques ſeditieux
de Troye, ſur certains Huguenots reuenãs de leur
preſche.
Que ceux de Rouen, & d’Orléans menaçoyent
les preſches de prendre fin, les deux ans apres la
pacification derniere, paſſez.
Et parmi les gentils hommes courtizans, on
ſentoit ſouuent murmurer entre leurs dents, que
dãs la fin du mois d’Aouſt, on interdiroit les
preſches aux Huguenots, meſmes que pluſieurs gen-
