ceſſes, comme ils le pouuoyent deſirer en
apparence.
Quelques jours ſe paſſerent en feſtes &
banquets, attendant le iour des nopces, que lon dilayoit
pour diuers reſpects d’vn iour à l’autre : entre
autres, pour ce que le cardinal de Bourbon, qui deuoit
receuoir les promeſſes du mariage, n’y oſoit
toucher ſans diſpenſe du Pape, qu’il luy auoit enuoyé
demander : laquelle apres eſtre venue, & à
ſon gré n’eſtant aſſez ample pour ſa conſcience, il
fallut renuoyer à Rome, pour en auoir vne à ſa
fantaſie : Et ſur ce, le Roy faiſant ſemblant de ſe
faſcher de tant de remiſes, blaſphemant & deſpitant,
iura, qu’il vouloit que le mariage ſe conſommaſt
ſans plus tarder : que ſi le cardinal de Bourbon
ne les vouloit eſpouſer, il les meneroit luy-meſme
à vn preſche des Huguenots, pour les y faire
eſpoufer à vn miniſtre : Et que par la mort-Dieu
il ne vouloit pas que ſa margot (car ainſi appelloit-il
ſa ſœur ) fuſt plus longtemps en ceſte
langueur.
Ali. La bonne dame n’auoit garde d’auoir ſi longtemps
attendu : Monſieur ſon frere ſcauoit bien
qu’il auoit eu ſon pucellage.
L’hiſt. Ie ne ſcauois pas cela : Mais i’auois bien
ouy dire qu’elle eſtoit preſte d’accoucher dés lors
que la Royne fut à Xainctes.
Ali. Il eſt ainſi ie t’aſſeure. Et tu vois que ces beaux
Princes ne font maintenant que le cerf de depuceller
leurs parentes. Regarde moy vn roy d’Eſpagne,
& vn Archeduc Ferdinand, chaſcun d’eux
n’a-il pas ſa niece ?
