de ma patrie, de mon Roy, & des ſiens, ie
deſireroy’ eſtre enſeuely au plus profond du puys de
l’oubliance.
Ali. Commence donc ie te prie, Hiſtoriographe
mon amy, ſans y adiouſter du tien, ny te mõſtrer
paſsionné pour l’vn ou l’autre party : dy-nous
ſimplement le faict.
Hiſt. Ie ne le puis pour maintenant dire qu’en
gros, n’ayãt pres de moy mes memoires : mais
i’eſpere biẽ en Dieu, qu’vn iour ie lairray le tout par
le menu, & comme il s’eſt paſſé, ſans en rien
diſsimuler, eſcrit à la poſterité.
Pour ceſte heure, Oyez.
La lumière de l’Euãgile (car ainſi l’appelloit-on)
commençant par la voix & les eſcrits de Luther,
Bucer, Zuingle, Ecolampade, Melancthon, &
autres doctes perſonnages, comme de nouueau à ſe
manifeſter : Le Pape (tout ainſi qu’en Alemagne
par ſes menees, & par les armees & moyens de
Charles le quint, auſsi en France par le moyen
de Frãçois premier) s’y oppoſa fort & ferme pour
en empeſcher le cours, auec bourrees & fagots,
iuſques à faire bruſler par ſentences & arreſts, les
liures du vieil & nouueau Teſtament, d’où lon
tiroit ceſte doctrine, s’ils eſtoyent tournez en
François ou autre langage vulgaire, & auec les liures,
ceux qui les maintenoyent, qu’on nomma pour
lors Lutheriens. Ceux de Merindol en Prouence
peuple inſtruit de longue main par ſes
predeceſſeurs en la doctrine de l’euangile furent par
arreſt du parlement de Prouence en l’an 1540. condemnez
comme Lutheriens à eſtre bruſlez. Et
