la defendent.
Mais ce qui ſe fait tous les iours deuant nos
yeux, en noſtre France. Qu'un homme maſtine
cent mille villes, & les priue de leur liberté, qui
le croiroit, s’il ne faiſoit que l'ouyr dire, & non le
voir? Et s’il ne ſe voyoit qu’en pays eſtrange, &
lointaines terres, & qu'on le diſt, qui ne pẽſeroit
que cela ne fuſt pluſtoſt feint ou trouué, que non
pas veritable ? Encores ce ſeul Tyran, il n'eſt pas
beſoin de le combatre, il n'eſt pas beſoin de le
deffaire, il eſt de ſoy-meſme desfait : mais que le
pays ne conſente pas à ſa ſeruitude : il ne faut pas
luy oſter rien, mais ne luy donner rien : il n’eſt pas
beſoin, que le pays ſe mette en peine de faire riẽ
pour ſoy, mais qu'il s'eſtudie à ne rien faire contre
ſoy.
C'eſt donques le peuple meſme, qui ſe laiſſe,
ou pluſtoſt ſe fait gourmander, puis qu’en ceſſant
de ſeruir, il en ſeroit quitte.
C'eſt le peuple qui s’aſſeruit, qui ſe couppe la
gorge : qui ayant le choix, ou d’eſtre ſerf, ou d'eſtre libre, quitte ſa franchiſe, & prent le ioug, &
pouuant viure ſous des bonnes loix, & ſous la
protection des Eſtats, veut viure ſous l'iniquité,
ſous l'oppreſſion & iniuſtice au ſeul plaiſir de ce
Tyran. C'eſt le peuple qui conſent à ſon mal, ou
pluſtoſt le pourchaſſe : s'il luy couſtoit quelque
choſe à recouuurer ſa liberté, ie ne l'ẽ preſſerois
point : combiẽ qu’eſt ce que l’homme doit auoir
plus cher, que de ſe remettre en ſon droit naturel,
& par maniere de dire, de beſte reuenir
homme?
