ment que d’eſtat, & regne temporel, mais elle
importoit changement de la Religion, en laquelle,
quand les Princes voudroyent quitter leur offenſe,
negliger le ſoin qu’ils doyuent du ſalut, &
repos des ſuiets que Dieu leur a baillé en protection,
encores ne peuuent-ils quitter l’offenſe,
qui tend à renuerſer le regne de Dieu, ſon honneur,
& gloire, & ſon vray ſeruice.
Il eſt certain, que ſi la conſpiration euſt ſorty
ſon effect, la Religion euſt changé en Angleterre :
l’intelligence du Pape, du roy d’Eſpagne, & du
duc d’Albe le deſcouurent aſſez.
Que la royne d’Angleterre donques ſe repreſente,
le iuſte iugement que Dieu fit ſur Saul,
pour auoir ſauué la vie à Agag roy d’Amalec,
Roy qui auoit coniuré la ruine du peuple, & du
ſeruice de Dieu. Ceſte clemence le fit reietter
de deuant la face de Dieu, rendit inutiles les prieres
de Samuel, iuſques là, que Dieu luy deffendit
de prier pour Saul : & fît que le Royaume fuſt
tranſporté de luy à ſon prochain, ainſi qu’en parle
l’Eſcriture.
Achab ayant donné la vie à Benadab, ennemy
& contempteur de la puiſſance de Dieu, fut condamné
par la ſentence de Dieu, prononcee de la
bouche du Prophete, qui luy dit que ſon ame ſeroit
pour la ſiene. Dieu a voulu que les hommes
fuſſent clemens & doux à pardonner leurs iniures,
& ſeueres à punir les ſienes.
Et ſi on regarde bien l’hiſtoire ſaincte, en laquelle
les iugemens de Dieu ſe cognoiſſent au
vray, & par certitude : (Car aux prophanes, ils ne
