que tous les Rois feroyent en ſemblable cas, &
cõme ce duc d’Auſtriche fit enuers le roy d’Hongrie
duquel tu as parlé. Ie te reſponds que la royne
d’Angleterre a ſi bien iuſtifié ſon faict enuers
tous les Princes Chreſtiens, & monſtré que tant
par les loix & conuenances des deux royaumes
d’Angleterre, & d’Eſcoſſe, que par l’vſage obſerué
entre les predeceſſeurs Rois de l’vn & de l’autre
royaume, il luy eſtoit loiſible de retenir la royne
d’Eſcoſſe, & luy eſtoit impoſsible de la laſcher
ſans faire tort aux loix ancienes & à ſon eſtat, qu’il
n’eſt beſoin de faire plus grande inſiſtance ſur ce
point.
Et meſmes quand bien la royne d’Eſcoſſe euſt
peu pretendre auoir eſté iniuſtemẽt faite priſonniere
apres auoir faicte ceſte conſpiration, lon ne
peut dire qu’elle ne le ſoit iuſtement : comme il
aduient ſouuent que d’vne bonne cauſe, la pourſuyuant
par meſchans moyens l’on la rend mauuaiſe.
Pompee, Caton & le Senat Romain faiſoyent
tort à Ceſar de luy refuſer le triomphe ſi iuſtement
acquis : toutefois par ce qu’il le pourſuyuoit
par conſpirations contre la patrie, il n’y a homme
qui n’ait iugé, qu’il auoit fait de ſa bonne cauſe vne
mauuaiſe. Si on conſidere toutes les conſpirations
qui ſe font à vn eſtat, elles ſont la plus part
accompagnees de quelque tort, que l’on a faict à
ceux qui vienent iuſques à ceſte extremité & hazardeuſe
entreprinſe : mais ne s’enſuit pas pour cela,
qu’ils ſoyent innocens & non puniſſables.
La royne d’Angleterre meſmes ſuffira pour exẽ-
