Il y a biẽ eu en pluſieurs Roys & Princes, cõme
en tous eſtats, de la meſchanceté & nõ guere moĩs
d’exemples de ceux qui ont enfreint & violé ce
ſainct droit d’hoſpitalité, mais le conſentemẽt vniuerſel
de toutes les nations de la terre a deteſté ceſte
perfidie, la fin mal heureuſe de la plus part des
perfides les condamne aſſez, les poetes s’en ſont
ſeruis pour ſuiets de leurs tragedies, & les ont logez
en leur enfer fabuleux, parmi les plus cruels
tourmens qu’ils ont peu excogiter. Les hiſtoires
en rapportent des exemples dignes pluſtoſt d’eſtre
enſeuelis que recueillis en la memoire des
hõmes, ſi n’eſt pour la fin qu’ils ont eue miferable.
On n’a que faire de diſputer ſi la royne d’Angleterre
à donné la foy à la royne d’Eſcoſſe, de la
tenir en ſeureté : Car depuis qu’elle eſt receue, la
detenir vn ſi long temps, cela importe à ſes promeſſes
de ſeureté : autrement il euſt fallu dés le cõmencement
ne la receuoir point, comme on voit
par les hiſtoires Romaines, que quand ils ne vouloyent
donner ſeureté aux eſtrangers qui venoyẽt
à eux : Ils leur commandoyent dedans dix iours
de deſloger de l’Italie, mais que depuis qu’ils les
auoyent receus, ils les ayent recerchez de rien,
on ne l’a veu jamais. Auſsi n’y a-il homme qui
ne blaſme ceux qui de froid ſang font mourir vn
qu ils tienent en leur puiſſance, encores qu’il ſoit
leur ennemy, & par eux prins en guerre, ce que
n’a eſté la royne d Eſcoſſe.
La troiſieme qualité de la royne d’Eſcoſſe eſt,
qu elle eſt priſonniere. Il ſembleroit que ceſte
qualité luy deuſt preiudicier, par ce que par cela
