Le pol. Quant au deſſein de ce bon Prince, ie ne
m’esbahy pas par trop qu’il s’en ſoit allé en fumee,
veu la tiedeur & lentitude de laquelle les
Princes marchent, quand il eſt queſtion de repurger
les Egliſes qui leur ſont commiſes. Conſiderãt
aufsi la malice des Peuples qui abuſent le plus
ſouuent du bon naturel de leurs Princes. Mais de
ce fait-là d’Angleterre : i’en demeure tout eſtonné.
Quelle iniuſtice ! Quelle d’eſloyauté ! Ie me
doute bien d’où cela peut venir, il ne peut proceder
que de la bobance, ambition & inſolence des
Prelats Anglois, fauoriſee de la Chattemiterie
de quelques vns du conſeil que ie te pourrois biẽ
nommer. Mais qu’ils oyent (outre les paſſages de
l’Eſcriture) ce que dit quelque grand perſonnage
de noſtre temps, parlant de la diſcipline Eccleſiaſtique.
S’il n’y a (dit il) nulle compagnie, ni meſmes nulle maiſon
quelque petite qu’elle ſoit, qui ſe puiſſe
maintenir en ſon eſtat, ſans diſcipline : Il
eſt certain qu’il eſt beaucoup plus requis d’en auoir
en l’Egliſe, laquelle doit eſtre ordonnee mieux que
nulle maiſon, ny autre aſſemblee.
Pourtant comme la doctrine de noſtre Seigneur
Ieſus eſt l'ame de l’Egliſe, auſsi la diſcipline eſt en
icelle, comme les nerfs ſont en vn corps pour vnir
les membres & les tenir chacun en ſon lieu & en
ſon ordre. Pourtant tous ceux qui deſirent que la
diſcipline ſoit abbatue, ou qui empeſchent qu’elle
ne ſoit remiſe au deſſus, ſoit qu’ils le facent à
leur eſcient, ou par inconſideration, cerchent d’amener
l’Egliſe à vne diſsipation extreme.
L’hiſt. Cela eſt tant bien dit que rien plus : Mais
