te ſupplions Seigneur, qu’il te plaiſe en nous pardonnant
nos fautes, continuer tes benedictions &
graces ſur nous, & ſur tes autres enfans & ſeruiteurs,
comme tu cognois eſtre expedient pour le
bien de ta gloire. Sur tout Pere & Sauueur, fay
nous touſiours fermement eſperer és promeſſes
du ſalut eternel qui nous a eſté acquis par le ſang
precieux de ton fils ton bien-aimé. Et nous fay
continuellement dependre de ta prouidence, par
laquelle iuſqu’aux plus petits d’entre les oyſeaux,
ſont nourris & ſouſtentez, & les cheueux de nos
teſtes comptez & gardez, iuſques à tant Seigneur,
que tu nous retires de ces miſeres, pour nous faire
iouyr de l’immortalité bien-heureuſe, de laquelle
iouyſſent ceux que tu as retirez en paix. Cependant
Seigneur, nous te ſupplions de prouuoir
en general & en particulier, à toutes les neceſsitez
de ton Egliſe, de haſter le temps de la vocation
des tiens, & abbreger les iours de la reſtauration
des choſes. Et de nous faire en particulier la grace
que nous puiſsiõs bien toſt eſtre rendus en ſauueté,
à l’Egliſe qui nous a enuoyé pour luy pouuoir
rendre fidelemẽt compte de la charge qu’elle
nous a donnee : fay-le Seigneur, pour l’amour
de Ieſus Chriſt ton Fils noſtre ſauueur. Ainſi
ſoit-il.
Le pol. Anſi ſoit-il. Or il faut que ie te dye deuãt
que paſſer outre, que ie me reſiouy grandement,
& m’eſmerueille quand & quand, conſiderant la
peine que tu as eue, & les dangers par où tu as paſſé
en faiſant vn ſi long voyage, de l’embonpoinct
que tu nous en rapportes.
