en leur puiſſance, que ce ſoit ce qu’ils deſiroyent.
Ainſi dy-ie m’auient-il de te voir maintenãt
icy.
Le pol. Ie t’aſſeure mon grand amy, qu’il m’auient
auſsi tout de meſme, en t’y voyant.
L’hiſt. Si n’eſt-ce fable, ny fantoſme, nous voicy
tous deux, Dieu merci.
Le pol. Dieu ſoit loué, qui nous a conduits à ſauueté,
& nous a faict entrerẽcontrer lors que nous
y penſions le moins. S’il te ſemble nous en remercierons
enſemble noſtre bon Dieu, de tout noſtre
cœur, & puis apres nous entretiendrons l’vn l’autre
tout à l’aiſe du ſuccez de nos voyages.
L’hiſt. Nous ne pouuons honeſtement laiſſer paſſer
ceſte occaſion, de remercier bien humblemẽt
noſtre grand Dieu, ſans encourir le vice d’ingratitude,
l’vn des plus deſplaiſans à Dieu, & moins
ſouffrable entre les hommes. Mais il nous faut
tenir la porte cloſe, pour euiter l’inconueniẽt qui
nous pourroit ſuruenir, veu le lieu où nous ſommes :
où le pur ſeruice & l’inuocation du nom de
Dieu (comme en tout le reſte de la Papauté) eſt
deffendue.
Le pol. I’eſpere que bien toſt (comme il nous eſt
commandé de Dieu, expedient pour nos miſeres
& neceſſaire pour noſtre deuoir) il nous ſera auſsi
permis de ſeruir Dieu par tout ouuertement. Apres
que ſa Maieſté aura fait iuſtice de la grande
Paillarde, qui a corrompu la terre par ſa paillardiſe,
& qu’il aura vengé le ſang de ſes ſeruiteurs de
la main d’icelle : lors que les Rois de la terre, qui
ont paillardé auec elle, & ont veſcu en delices,
