ſoyent conſeruez en amitié, & en paix, comme cõpatriotes
& freres bien-aimez : en leur communiquant
de la doctrine de ſalut auec toute charité &
affection chreſttiene, autant qu’ils ſe voudront rẽdre
capables & dociles pour la receuoir : ſans vſer
en leur endroit pour regard de la foy que d’vn bõ
exemple, que chacun s’efforcera de leur donner
en bien viuant, ſuffiſant moyen (s’il plaiſt à Dieu
le benir) auec la predication de l’Euangile, pour
les amener à la cognoiſſance du ſouuerain biẽ de
l’homme.
34Vray eſt, que pourautant que l’eſtat affligé
des fideles pourroit auoir beſoin de viures, munitions
& deniers, les Catholiques François (ainſi
traictez que dit eſt) pourront eſtre priez de les en
ſecourir : & aduenant qu’ils refuſaſſent de le faire,
y pourront en cas de grande neceſsité eſtre contraints,
par tous les plus honneſtes moyens dont
on ſe pourra auiſer : ce qui ne pourra tourner à
blaſme, ſi on conſidere que Dauid en la neceſsité
s’eſt ſerui des pains de propoſition.
35Surquoy les Chefs & Conſeils ſeront aduertis,
de bien & ſoigneuſement meſnager tout
ce qui pourra tomber en meſnage, & profit publique,
pour ne rien deſpendre ſuperfluement, & n’auoir
à charger les amis plus que de beſoin : Prenãs
garde à ce que Tite Liue dit, que la guerre ſe nourriſt
elle-meſme, comme l’enſeigne tresbien le lõg temps
que Annibal a mené la guerre en Italie,
ſans auoir aide, ou argent frais de la republique
de Carthage :
36On ſcait bien que quand on ſera cõtraint
