& par ta bõté ſauue moy : Car Seigneur, ie remets en toy & moy & mon affaire, n’ayant eſperance qu’en ta bonté, & attendant ta iuſtice ſur les peruers & iniques. Accompli & parfay ton œuure, Seigneur. Mets en veuë la preud’hõmie des tiens, afin que leur innocence & bonne vie reluiſe & apparoiſſe comme tu l’as promis, Que ſi (comme il peut eſtre, & toy ſeul le cognois Seigneur) il y a quelques vns de tes enfans meſlez parmi ces deſloyaux, comme nous auons iadis veu Paul tõ vaiſſeau eſleu perſecuter les tiens auant ſa conuerſiõ : Abbrege les iours, Seigneur, haſte le tẽps de leur vocation, afin que parauenture ils ne ſoyent comprins ſous meſmes iugemens, & periſſent parmi les faux vieillards de Suſanne. Suſcite tõ Daniel, Seigneur, pour la iuſtification de ta ſeruante, & nous exauce pour l’amour de Iefus Chriſt tõ Fils noſtre Seigneur.
Ali.
Adonc tous pleins d’eſiouiſſance
Tes enfans qu’on a oppreſſez,
Voyans deſrompus & caſſez
Les peruers par iuſte vengeance,
Dedans le ſang ſe baigneront
De ces meſchans, & puis diront :
L’innocent ne perd point ſa peine,
C’eſt vn poinct du tout arreſté,
Quoy que le iuſte ait enduré,
C’eſt vne choſe bien certaine
Qu’il eſt vn Dieu, qui iuge icy,
Les bons & les mauuais auſsi,
Dan. Ie fuis innocẽt de ce ſang reſpandu : Et pour
dire ce qu’il me ſemble d’vne telle perfidie &
