ueré en ſon viuant) Et fut l’autre arreſt executé
ſur les perſonnes propres deſdicts Briquemaut &
Cauagnes, en la preſence du Roy qui les voulut
voir mourir : eux proteſtãs du tort qu’on leur faiſoit,
& en demandans vengeance à Dieu.
L’egl. Ie puis bien dire maintenant auec Dauid,
parlant de la meſchanceté des miniſtres de Saul,
& de leur iniquité & iniuſtice.
Entre vous conſeillers, qui eſtes
Liguez & bandez contre moy,
Dites vn peu en bonne foy,
Eſt-ce iuſtice que vous faites ?
Enfans d’Adam, vous meſtez-vous,
De faire la raiſon à tous ?
Ainçois voz ames deſloyales
Ne penſent qu’à meſchanceté,
Et ne peſez qu’iniquité,
En voz balances inegales.
Car les meſchans dés qu’ils ſont nez
Du Seigneur ſont alienez.
Ali. Les iugemens de Dieu ſont grans : Mais ie
veux bien dire en paſſant (ſans entrer aux particulieres
occaſions de courroux que tous hommes
donnent à Dieu par leurs pechez, & ſur tous, ceux
qui ſcauent la volonté du maiſtre & ne la font,
car cela eſt immenſe) qu’il ne ſe pouuoit faire, que
le Seigneur ne fuſt merueilleuſement emeu à ire,
de ce que les Huguenots (comme s’ils euſſent perdu
toute ſouuenance des bien-faits de Dieu, qui
ſeul les auoit iuſqu’à lors conſeruez : voire tant de
fois & par miracles tant extraordinaires retirez
d’extremes perils) n’auoyent les yeux ny l’eſpe-
