Seront aux loups pour carnages ſemez.
Les Leſtrigons, les Cyclopes, qui n’ont
Qu’vn oeil au front, en leur rochers ne ſont
Si cruels qu’elle, à toute peſte nee :
Qui en filant menee ſur menee,
Guerre ſur guerre, & debats ſur debats,
Fera mourir la France par combats :
Mais à la fin ſous les mains de Clotaire
Doit de ſes maux receuoir le ſalaire.
Le pol. Mon Dieu, qu’eſt-ce là ? qui vit iamais deſcrire
mieux les choſes deſſous noms couuerts?
He que ces Poetes ſont grands ouuriers ? il y en a
mille & mille qui liront cela ſans l’entendre, & ce
pendant on n’en ſcauroit dire dauantage en peu
de mots.
Ali. Le bon eſt, que Iamyn qui a fait les argumẽs
de la Franciade de Ronſard, & qui cognoiſt bien
le ſens caché ſous l’eſcorce, & l’intention de l’Auteur
l’a eſclarcy en l’argument du 4. liure, quand
en parlant de l’erreur Pythagorique, touchant la
tranſmigration des ames, il dit que Ronſard ſe
ſert expres de ceſte fauſſe opinion, afin que cela
luy ſoit comme vn chemin & argument plus facile,
pour faire venir les eſprits des vieux Rois en
nouueaux corps : car ſans telle inuention, il euſt
fallu ſe monſtrer pluſtoſt Hiſtoriographe, que
Poëte.
Le pol. Voila qui va bien. Mais ſi ſeroy’-ie bien
marri que la prophetie de Ronſard aduint touchant
ceſte poure Princeſſe la Royne regnante,
qu elle fuſt eſtouffee par ſon mari : quant à Brune-
