Qui viuent gras des impoſts & des maux,
Que les Rois font à leurs poures vaſſaux :
Tant la faueur qui les fautes efface,
Fait que le ſot pour habile homme paſſe
Quelle fureur ! qu’vn Roy pere commun
Doyue chaſſer tous les autres pour vn,
Ou deux, ou trois ! & bleſſer par audace
Vn maſle cœur iſſu de noble race,
Sans regarder ſi le flateur dit vray !
Ce Childeric doit cognoiſtre à leſſay
Le mal qui vient de croire à flaterie,
Perdant d’vn coup & vie & ſeigneurie.
Le pol. A ce que ie voy, vrayement Ronſard triomphe
de dire, & touche de merueilleux poincts. Ie
n’euſſe iamais penſé, qu’il euſt oſé mettre ces choſes
ſi clairement en auant du viuant de ce Roy,
quoy qu’il les couche ſous d’autres noms feincts.
Phil. Or confere ie te prie maintenãt ce que nous
auons veu, auec ce diſcours.
Ali. Certes c’eſt vn piteux eſtat, ie ne ſcay qu’en
dire.
Le pol. Comment eſt-il poſsible que Ronſard ait
publié cela ?
Ali. Il en dit bien d’auantage : Il deſcrit bien encores
plus particulierement ce Roy & ſon règne,
ſous le nom de Chilperic : l’impudicité de
la cour, les meurtres, l’eſtoille nouuelle qui apparoiſt,
& autres ſignes : l’obſtinatiõ du Roy iuſqu’à
predire qu’il eſtouffera ſa femme pour eſpouſer
ſa putain.
Le pol. He ie te prie ſi tu te ſouuiens de ce qu’il en
dit, recite-le moy.
