d’Acier, & quelques autres Huguenots ſe retirerent
à ſauueté : tellement qu’à leur retour de la
pourſuyte, & quelques iours apres, le Roy leur en
fit mauuais viſage, croyant que ceux qui eſtoyent
reſchappez, n’eſtoyent ſauuez que par leur faute.
Tout ce iour de Dimãche 24. d’Aouſt, fut
employé à tuer, violer, & ſaccager : de ſorte, qu’on
croit que le nombre des tuez ce iour-la dans Paris
& ſes faux-bourgs, ſurpaſſe dix mille perſonnes,
tant ſeigneurs, gentils-hommes, preſidens,
conſeillers, aduocats, eſcoliers, medecins, procureurs,
marchands, artiſans, femmes, filles, qu’enfans,
& preſcheurs. Les rues eſtoyent couuertes
de corps morts, la riuiere teincte en ſang, les portes
& entrées du palais du Roy peinctes de meſme
couleur : mais les tueurs n’eſtoyent pas encore
ſaoulez.
Le Roy, la Royne ſa mere, & meſsieurs ſes freres,
& les dames ſortirent ſur le ſoir, pour voir les
morts l’vn apres l’autre : Entre autres, la Royne-mere
voulut voir le ſeigneur de Soubize, pour ſcauoir
à quoy il tenoit, qu’il fuſt impuiſſant d’habiter
auec ſa femme.
Vers les cinq heures apres midy de ce Dimanche,
il fut fait vn ban auec les trompettes de par
le Roy, Que chacun euſt à ſe retirer dans les maiſons,
& que ceux qui y eſtoyent, n’euſſent à en ſortir
hors : ains fuſt ſeulement loiſible aux ſoldats
de la garde. & aux cõmiſſaires de Paris auec leurs
trouppes, d’aller par la ville armez, Sur peine de
grief chaſtiement à qui feroit au contraire.
Pluſieurs ayans ouy ce ban, penſoyent que l’af-
