Cette page a été validée par deux contributeurs.
Que trouvés vous qui nuyre puisse
Plus au quatre completions ?
L’Astrologue.
Les maulvaises conditions
D’ambition et de Justice
Cheus au signe de l’Escrevice
De Justice signantement,
Dangier est s’il y a eclypse
En Chatelet ou Parlement
Le Prince.
Touchés moy principalement
De ces eclipses. Qu’esse a dire ?
L’Astrologue.
C’est a dire un aveuglement :
Qu’on ne voit plus Justice luyre.
Primus.
Grogne Gaultier, voycy ung sire
Qui dira mirabilia.
Chascun.
Il ne dit que ce qu’il y a
Et qu’on voit le monde conduire.
L’Astrologue.
Viene qui voudra contredire :
Il est eclipse voyrement
En plusieurs lieux au temps present.
Le Prince.
Quant bonne Justice luyroit
Et n’aroit poaint d’empeschement,
Tel vit qui au gibet seroit.