qui auront du plaiſir à me lire, auront d’auantage de contentement à m’entendre, & plus grand deſir de me cognoiſtre. À propos d’humeur, i’oubliois à vous dire que la mienne eſt compoſée de telle ſorte, qu’elle voudroit plaire à chacun, & ne ſe ſoucie nullement de ceux qui s’en faſchent. I’ayme qui m’ayme, & qui me hait ie le quitte. Auec les Rabeliſtes ie ſçay rabeliſer, & treuue plus aiſé aux ſages de contrefaire les folies des fols, qu’aux fols d’imiter la ſageſſe des Sages : ie ne me dis pas pourtant ſi ſage, que ie ne confeſſe auoir autant eſtudié en Philoſofolie qu’en la Philoſophie. Faites en tel iugement que voudrez : quoy qu’on die, il ne m’en chaut d’vn feſtu. Blaſonez tant que voudrez : conſpirez & deſpitez tout ce que pourrez : vous n’auez dequoy m’oſter le Soleil : ie ſeray touſiours Panurge : les
