Maiſon), ſi ie n’euſſe premierement eſté auec inſtantes
prieres, & commandements Maternels, deputée
& deleguée de tout le corps de nos cheries Menades
& Coribantes ſœurs adioinctes & aſſociées à cette
voſtre noble aſſemblée : leſquelles ayant eſté aduerties
par voſtre Huißier Harpetirade de voſtre reſolution
en la tenue d’icelle, ont eſtimé eſtre à propos
de m’y enuoyer pour enſemble en deliberer &
conclure leurs raiſons au prealable par moy deuãt
deduictes. Ce n’eſt pas pour ſeconder l’ambition &
les genereux deſſeins de noſtre Sœur Diaphonia qui a
tantoſt parlé, bien que l’affaire nous ſoit beaucoup
de plus d’importance qu’à elle (mon germain comme
perſonne n’ignore, batant en Tapinois par ruſes
du troiſieſme Pilier de la grande Sale du Palais de Badaudois,
& autres de la croix blanche pres noſtre
Cohue non encore cy deuãt miſes en lumiere apres
la meſme proye que Calianthe) Mais bien pour vous
aduertir de nouuellement inuentez moyens, &
vous offrir le gros de toutes nos forces corporelles
& ſpirituelles, qui ne porteront peu d’efficace à ce
que nous reſpirons.
C’eſt vne vray-ſemblance eminente, que le deſir dont nos Geniteurs ſe chatouillent à la deſcouuerte d’vne maiſon affluente en toutes eſpeces de fortunes humaines pour y attacher mon vnique Germain, & qu’en ſoy elle reſſerre l’Alexipharmarque requis & neceſſaire à la vuidange de ſes melancholiques humeurs Neapolitaines, qui vrays Antropophages ſe repaiſſent, cruelles, de la creme de ſon ſang, & du plus pur de ſes mouelles il y a tant de temps, apparoiſt le ſeul moyen d’eſcrouller le baſe des deſſeins de Calianthe. Car ſi ainſi eſt que le Dabo ( com-
