Souuigné, ou l’attẽdoit le MISTOUREAU, pour
y danſer vne fateſque. Ils y gaignerent gros nos violons,
le gentillaſtre cedant au villain, & veis homme
qui leur en voulut rendre leur argent vne fois payé
pour deux années & porté par tout, à ce qu’il diſoit
chez les trois Maries ou fut beu le denier à Dieu, &
donné le vin du marché le 17. d’Octobre qui vient
l’an mil ſix cents & tant ou plus, le iour que lon liure
la ſouppe aux vaches heure de veſpres, & la clef
de leurs trous aux filles pour abecher les paſſereaux
qui ne bougerent d’eſtourdir les accouplez de leur
guillery, & encore que ſignes culletiers ſe feiſſent
euidents & tres-notoires pour les faire deiucher, ſi
ne voulurent-ils iamais quitter la place les bleuteurs
de farine d’aumoſne, qui fut cauſe de les penſer faire
auoir Dronos pour leur importunité qui attraiſnera
le faiſte & comble de ſes deſirs bon gré mal gré il
faut qu’il l’aye, & croy certainement que toutes
nos meſdiſances n’y ſeruiront pas d’vn chou, que ce
mal-heureux feiſt branler du pied en noſtre iardin
des faux-bourgs comme les affaires venoient au Pot,
la main deſſoubs le dos de peur de diffamer mes
beaux habits de grãdes feſtes, d’autant que c’eſtoit
ſur terre franche. I’euſſe deſiré alors eſtre morte,
car cette petite mauuaiſe comme trois loups en empeſcha
la meſure nous aperceuants à nos deduicts
le Diable y aye part : mais il eſt infortuné en endouilles,
croyant que tout Soleil faict mal à ſa veuë tant il
eſt lourdault cet eſcouillé, à ſept treze ce n’eſt
pas trop, veu qu’a chacun les ſiens c’eſt iuſtice, bien,
bien, vn bon gaucher Aduocat, ou marchand, vault
mieux qu’vn mauuais droictier : Car ie vous ſupplie,
ne le faict-il pas beau veoir parler d’vn hõme
Page:Reboul - Le Premier acte du Synode nocturne, 1608.djvu/74
Le texte de cette page a été corrigé et est conforme au fac-similé.
74