Page:Reboul - Le Premier acte du Synode nocturne, 1608.djvu/72

72

à la porte, que la Mere y eſtoit toute Poacrée, Beniſt ſoit le germe humain & ſacré, au fond, tout eſt mortel, & par conſequent fragile : Les potiers n’en furent brin courroucez, & quoy que lon die que ce conſeil n’eſt pas mauuais, que coutre & filler, eſt le principal meſtier des filles veu que nature n’a rien faict de vuide ſi eſt-ce toutefois que le lõg temps qu’elle ne s’eſtoit faict fourbir les gauffriers, luy feiſt inuenter beaux remedes à amolir la Corne, & par ſentence expediée à pied & à cheual en l’eſcurie aux poulles : Mon Dieu que c’eſtoient de beaux œufs, que ceux de noſtre Brehaingne : Ie ne ſçay ce que ſe peut eſtre pour eſtre ſorties toutes d’vn trou, mais ſa ſœur à la bouche meilleure, & l’eſperon plus vif que quatre Truyes le laict m’en ſemble de bõ gouſt pour n’en auoir veu encores la datte ſeulemẽt i’eus le loiſir de monter & de deſcendre, i’ay bien compté, & tellement que la croyance m’eſt venue qu’ils s’entrechiquenaudoient ſur le chemin du grand Parc, en ma vie ie ne veis tant de caqueroles, que dans les deſtours de ce Dædale : Tout fut pourtant retrouué, & deux à deux comme les moynes. A propos leur Egliſe ne ſe commence point, ſi iront-ils chercher qui les couurira, en tant qu’a Paris ſur Seine trois bateaux y a appareillez à receuoir les deux banneaux de tuilles qui furent leuez quand (vous m’entendez bien) entra dans la caue par la couuerture du grenier : Diable ſoit mort de l’accrochement, voila que c’eſt que d’vn fiffre en venaiſons, on ne le ſçauroit tenir, ſi fallut-il prendre patience, bien que en enrageant, tellement que marteaux deçà, marteaux de là, en fin la teſte vinſt & le cul eſtout, dà, car ſans cela Madame n’en euſt peu rien faire, la,