Page:Reboul - Le Premier acte du Synode nocturne, 1608.djvu/48

48

leurs deſſeins ? que ie te cheris, nef à tout voile ſaincte lampe Clauſtrale, d’auoir eſté partagée du ciel, & doüée d’vne telle dexterité à toutes ſortes de negoces fœminins. Croy-moi, tu leue la paille ſur le general de noſtre ſexe à ce ſeul échantillon, on iugera la piece. S’eſtre aduãcée en tel credit que cependant que Cloris & ces domeſtiques ſont à l’Egliſe pouuoir communiquer priuatiuement entre deux parois, & paraduenture plume & cuir, que me chaut ſi l’on Iuge des cauſes par les effects, auec celuy duquel dependent les Eſcritures & les Prophetes. N’appelez-vous pas cela vne ſuperlatiue impudence, & vne effrontée temerité, digne & du nom de fille & de ce Synode mi-party. I’en obmets pluſieurs autres, qui ſont de poids & au-delà, les plus imbecilles s’en ioüans à la pelotte, tant y a qu’il ne nous eſchapera pas & ſera la feſte carillonnée comme double & des principales du vilage, pour mon regard i’en veux auoir tout du long ſans rien requerre ſe ſont mes couleurs au preſent, paſſé & futur, deuſent tous les Origeniſtes s’en detrãcher les teſticules. Mais pour retourner à notre ſubiect ce n’eſt pas tout que de ce fourrer à teſte baiſſée dãs vne affaire de telle importance qu’eſt celle-cy, il faut regarder ce que nous trafiquerons au milieu d’icelle, & puis apres auiſer à la ſortie, mon opinion eſt, ſi vous la trouuez de gouſt, que nous eſbruitiõs que cet office de Court, duquel ie vous ay ci-deuant faict mention eſt ſaiſi & preſt à eſtre decreté par les creanciers, pretendus par nous, de ſon Reſignant, nous ne faudront poinct d’amis ſur les lieux qui corroboreront noſtre dire, ils ſont trop enuieux de ſa fortune, ſi fortune ſe peut dire pour luy ceſte re-