fortune ayant fait donner (comme ie vous ai dict)
dãs nos toiles vn tel ſubject pour mettre à la lumiere
l’effect de notre oyſiueté (de laquelle les dieux
vengeurs prendront congnoiſſance vn iour viendra
puis qu’elle eſt employée ſi mal-heureuſemẽt)
il eſt queſtion auſſi (laiſſant à part les excremens
d’vn vieil & laſche eſprit) d’auoir en noſtre manche
de plus viues & praignantes vrayes-ſemblances
pour choquer les pretenſions de Calianthe. Courage
mes enfans ; mon mauuais Ange m’en vient en
vne minutte de fournir de toutes frechemẽt cueillies,
voyez les comme elles ont encore la queuë
toute verte, ne ſçauez-vous pas de ce marché que
l’on dict qu’il a paſſé entre les gobelets pour cet
office de Court. Par S. Iean nous voilà dedans, il n’y a
plus qu’à remuer le cul ; vous ſerés mouché, monſieur
l’entrepreneur.
Zon ſur les doigts, zon ſur le groein,
Zon ſur le nez du ſagouein.
O iolis petits diabletons mes mignonnelets que vous ſçauez proprement diſtiler ce que pourquoy vous auez tant de tourment dans les entendoires de vos affides : car ſans mentir nous ne pourrions deſirer vne plus nerueuſe matiere pour lui donner le ſault : Eſt-il pas vray, troupe Zelée ? & que de ce tronc nous ferons germer plus d’vne miliace de branches qui ſeruirõt en fin à le bruſler luy & tous ces adherans, s’ils ne ſe rendent aux premieres volées de nos couleurines, & ſerpentes : ſaincte Barbe, comme ils ſeront plumez ? Courage donc & plus que courage, tãt plus ie rumine à part moy de moyens d’execution, & tant plus il m’en eſt offert par les meſmes eſtradiots & argoulets de Proſerpine.
