nous auons entrepris. Ce que toute l’aſſiſtance fiſt ſans aucun refus,
Qua de re pauor ſapientiam omnem mihi ex animo expectorauit.
Et d’abondant m’aporta frayeur que ces Antropophages
n’euſſent aualé auec ce breuuage la fantaſie
de ces Melancholies hypocondriaques qui ſe perſuadent
fortis imaginatio generans caſum, eſtre changez
en loups & autres beſtes rauiſſantes, qui me donna
volonté de ſortir de là, redoubtant les griffes de
ſes Menades impiteuſes, ce qu’eſtant impoſſible d’executer
pour eſtre la porte fermée ſoubs triple ſerrure
la neceſſité me força de ramaſſer mes ſens
mis en deroute par la pœur & les refortifier d’vne
plus robuſte aſſeurance. Comme ie vogois en ces
inquietudes qui deſia agiſſoient en mon ame i’aperçeus
la Mere Abeſſe qui faiſoit ſigne à Harpetirade
d’impoſer ſilence, d’autant qu’vne certaine entelechie
auoit ſaiſit ces Eimaropheans auſſi toſt que par
ſon operation il eut en leurs entrailles faict-ſentir
quelles eſtoient ſes forces, & l’effet d’icelles alloit
eſtre eſclos ſans aucune faute, n’euſt eſté que ce Ganimede
reformé donna lieu par la vertu de ſa baguette
aux iuſſions de la Superieure.
Tum mater omni loquens rerum cui ſumma poteſtas. Veſtue comme l’vne des anciennes preſtreſſes de la Deeſſe generatiue apres auoir eſſuyé ſes babines encores toutes ſanglantes, œilladé par trois fois le plancher de la ſale, inuoqué d’vn ſourd murmure les deitez Acherontides & Letheales, touſſi, craché & recraché Sartoralement, harangua en ceſte maniere ou approchant.