les ſieges de la ſalle, eſtoit diſſemblable & de contraire
tiſſeure à toutes les autres, & pource au preiudice
du deſordre accouſtumé, auoit eſté tenduë
en cet endroict de propos deliberé, afin qu’elle fuſt
auec plus de liberté veuë & regardée des Tribades
habitantes du lieu auſquelles elle eſtoit recente &
nouuelle, ce qu’elle contenoit eſtoit eſtranger, c’eſt
à dire auoir eſté executé és villes des Aſſociées, & ne
laiſſoit rien en arriere des plus remarquables &
miſterieus faicts d’icelles. De prime face ſon Mezzo
repreſentoit vne figure d’impudence ſoubs la forme
de ceſte effrontée Affrania, les veſtemẽs de laquelle
eſtoient remplis de pluſieurs figures Aerines &
Aquatilles : tellement qu’elle rapportoit en ce
poinct à celle Horrende Proſerpine quæ triformi facie
Laruales impetus Conprimit. Vn Panthée ſe monſtroit
au deuant d’iceux tenant d’vne main vn Cameleon
& de l’autre vne conque pleine d’Eſcume marine,
Ce qui reſtoit de vuide merueilleux en ſa diuerſité
pour eſtre maintenant blanc, tantoſt iaulne, puis
rouge & enflammé, & ce qui troubloit plus mon
eſprit, vne autre fois noir & obſcur, ne contenoit
rien ſi non Chahuans, Cheueſſes, Corbeaus, Charonniers,
Orfraies, Loups Marins, Scorpions, Remores, Luctes, &
autres animaux, de mauuais, funebre & funeſte augure.
Tout ioignant ceſte figure ſe voyoit l’impur reiecton du barbare Meſſala, qui immoloit à Venus publicque vne cheure blanche, & au Dieu tutulaire des iardins, vne geniſſe marquetée de noir, blanc & fauue. Ce reiecton eſtoit gorgé d’vn appetit tellement libidineus que l’on le pouuoit contempler en cette piece çà & là, ſoubmis à vne infinité d’a-