min aux premiers traicts d’vn ſcandaleux, illicite,
mal-heureux & deteſtable feu Cerberique Monachal,
les flammes duquel n’eurẽt toutefois aucune
force contre ſes ſens pudics pour les auoir ſuffoquées
deuant qu’elles euſſent pris naiſtre. Il y
auoit encores ça & là dans ceſte meſme piece pluſieurs
geſtes Meſſalinins, & autres ſacrifices Priapiques
que mes yeux eurent en horreur de regarder
pour eſtre nouueaux & inaudits, ſeulement ie remarquay
ce demy vers autour du col de la haridelle,
————— Pietas geminato creſcit amore.
Et tout à hault ces trois autres :
————— Cuncta licere
Credimus, & ſequimur magnorum exempla Deorum
Nec nos dura mater, nec nos reuerentia Famæ
Aut timor impediet.
XIII.
Il me fut impoſſible de congnoiſtre ce que celle cy, qui eſtoit la 13. portoit en ſon milieu, d’autant que c’eſtoit elle qui me faiſoit vmbre, & ſoubs les aiſles de laquelle ie contemplois à mon aiſe toutes les autres & ce qui ſe paſſa dans le Synode : ce que regrettant, deſireux de ſçauoir le total, ie commence à tirer doucement, & ſans aucun bruict vn des bouts d’icelle auquel ie remarquay en ce que le temps me donna permiſſion vne Hoſteliere trahiſon de deux qui ſe vantoient auoir ſacrifié de long temps à Pylade & Oreſte, le plus pur de leur commune amitié deſquels l’vn recherchoit les merites d’vna Hermoſa Nympha, & l’autre ſoubs pretexte de lui vouloir dõner de l’ayde en ſes affections, ioüoit à bouté hors par parolles ambigues pour s’introduire s’il y auoit moyen en la place de ſon Riual. Ie