le-cy, ie ietté ma veuë ſur l’vne des aultres, que ie
ne recogneus de prime face, pource que par quelque
ſecret eſtrãge & hors de nature, elle auoit metamorphoſé
vn Surpelis qu’elle auoit veſtu, en vne
robe griſe cendrée dont ie fus beaucoup eſmerueillé
ignorant le moyen d’vne tant ſoudaine
tranſmutation. I’acoiſay touſtefois vn peu mon
eſprit recongnoiſſant qu’en ces paſſepaſſes la ſeule
forme eſtoit differente, le reſte demeurant matiere
de Breuiere, ces mots François entouroient en gros
caracteres le bas de la robe.
Effect certain du condiment Aeſopique tiré de la quinte eſſence de ſes langues.
IX.
Ceſte piece, qui eſt la neufuieſme en ſon ordre n’occupoit pour ſa petiteſſe tant de lieu que la precedente, mais qui receloit à la verité beaucoup plus de miſteres en vne vnique repreſentation. Elle portoit vne figure infernalle que l’on pouuoit iuger fœminine à ſa cheueleure enfumée, toute pouldrée de ſouffre, qui luy trainoit iuſques aux talons. Ceſte figure eſtoit fort groſſe & eſpeſſe, ſur la teſte de laquelle ſe liſoit vn eſcripteau truchement de ſon nom.
Elle auoit la main droicte appuyée ſur vn tronc de Cyprés nouuellemẽt eſclaté de la tẽpeſte, & de la ſeneſtre tenoit enchaiſnées les Eumenides ſœurs, ſon poulmon ne ſouffloit hors que l’Aconit, & ſur ſa face ne ſe repreſentoit autre choſe dépeinct que
————— Scelus, & lachrymas, rabiemque, & cædis amorem
Omnia trita ſimul.
