ſurpelits, frocs, & ſandales, des eſpees, poignards & alecrets,
des chappeaux Albanois, bonnets cornus, & ſans
cornes, des courtes robes, longues & moyennes, des habits
& veſtemens Gallianiſes, Eſpagnoliſes & Flandriſes, &
pluſieurs autres eſpeces de beſongnes qui ſont neceſſaires
aux humains pour exercer chacun ſa vacation.
Trois filles fillettées eſtoient dans le milieu de ceſte piece, qui ſembloient, ayans les bras ouuerts tendre à vouloir embraſſer toutes ces Rapſodies, l’vne d’entre elles, caparaçõnée d’vn double attour de taffetas noir, œilladoit les eſpées, robes & bonnets cornus, & quelquefois ne dedaignoit de contribuer à ces yeux les agreables & doucereus frocs, froquans, froquez. Les deux autres comme de moindre eſtoffe bien que trauaillées par gens experts, plus terreſtres & d’eſprit moins releué, ſe iettoient à corps perdu au milieu du reſte des bagatelles à qui en auroit : Il leur ſortoit vn riſible prouerbe de la bouche qu’elles tenoient pour maxime d’eſtat, Qui ne peut à l’vn, hay à l’autre. Au reſte du vuide de ceſte piece ſe voyoient les trois ſuſdites diſioinctes à part exerceantes de bonne volonté les outils qu’elles auoient emportés de haulte lute chacune ſur ſa compagne, il y auoit beaucoup de contentement à les contempler toutes trois ; mais ſans cõparaiſon eſtoit bien plus ſublime le plaiſir d’arreſter l’œil ſur l’vne d’icelles qui marioit à ſon pied vne paire de ſandales cucullatiues, & puis comme par meſpris les pouſſant à l’eſcart, prenoit vne Corne en main, & l’ayant tant ſoit peu maniée pour en oſter l’aſpreté s’en ſeruoit de ſuppoſitoire. Comme ie ruminois en moy-meſme quels deſſeins encornez auoit cel-
